Reyndar voru 39% óákveðnir (spurning hvort það tengist eitthvað tilvonandi framboði aldraðra og öryrkja og Framtíðarlandsins) sem gerir niðurstöðurnar ansi skakkar. En ég tel að Framtíðarlandið ætti að nýta sér þessa óákveðnu til að minnka fylgi XD. Ég tel það nefnilega mjög líklegt að það séu til margir andstæðingar sovéskra atvinnustýringar sem eru ekki alveg jafn öfga-vinstri eins og vinstri-grænir og hafa áttað sig á hve Samfylkingin er óstabíll flokkur. Það er akkúrat þessi hópur sem telst líklegur til að kjósa tilvonandi framboð Framtíðarlandsins.

Besta leiðin til að stjórna atvinnulífinu er að leyfa því að fljóta að sjálfu sér. Meirihluti landsmanna vinnur í litlum eða meðalstórum fyrirtækjum. Það hefur sýnt sig að það að þröngva risa álverum á staði þar sem smáfyrirtæki blómstra hefur ekkert nema þensluaukandi áhrif. Bara núna í fréttunum í gær var talað um að útgerðirnar á Austurlandi yrðu að hagræða til að lifa af komu álversins. Slík hagræðing gæti haft keðjuverkandi áhrif sem myndi leiða til fækkunar starfsfólks. Og ofan á það hefur þurft að loka ýmsum útibúum, m.a. hjá Símanum, vegna manneklu.
Það er eins og Siggi Eyberg, formaður Vinstri Grænna í Reykjanesbæ, sagði að ef lögð hefði verið jafn mikil áhersla á að styrkja lítil og meðalstór fyrirtæki á Suðurnesjum og lögð hefur verið í samninga í kringum álverið í Helguvík, þá væri löngu búið að redda miklu fleiri störfum en munu nokkurn tíma skapast í kring um þetta álver.

Stefna Framtíðarlandsins er að efla starfsemi þessara litlu og meðalstórra fyrirtækja.