Þeir græða pening t.d. á færslum, ef þú notar debetkortið þitt í búð þá borgarðu 11 kr. á færsluna. Ef þú tekur út af kortinu hjá gjaldkera minnir mig að það kosti 20 kr. í hvert skipti. Árgjaldið á debetkortinu er 200 eða 300 kall. Árgjald er á visakortinu líka. Ef þú ert með yfirdráttarheimild borgarðu rosalega vexti af því sem þú ferð yfir. Ef þú ferð yfir heimild borgarðu sekt. Nú og ef þú ert bara góður kúnni sem geymir allt þitt sparifé inni á bók, þá vill bankinn fá þig líka vegna þess að þeir eru að borga þér skít á priki vexti fyrir spariféð meðan þeir eru að lána það út, t.d. til þeirra sem eru með yfirdrátt á miklu hærri vöxtum.

Verðbólga myndast t.d. þannig að eins og hefur verið undanfarið er þjóðin búin að eyða of miklum gjaldeyri. Ef allir t.d. kaupa sér nýja bíla þá þarf að eyða í það gjaldeyri. Ef Íslendingar eru ekki að selja nógu mikið á móti til útlanda til að fá þennan gjaldeyri til baka, þá verður viðskiptahalli. Þá vilja fleiri (t.d. heildsalar) kaupa gjaldeyri til að kaupa vörur erlendis frá heldur en eru að selja gjaldeyri (t.d. fiskverkendur) sem þeir hafa fengið fyrir að selja vörur út. Þá hækkar gengið t.d. á dollar og evru. Þá þurfum við að borga fleiri krónur fyrir vöruna sem við flytjum inn þannig að verð hækkar, þá heimtar fólk launahækkanir til að mæta því. Einhver stétt fær launahækkun, þá vilja allar aðrar stéttir fá launahækkun, þegar allir eru búnir að fá hækkun er líka búið að hækka verð á allri þjónustu og vörum vegna þess að allir sem vinna við það fengu líka hækkun þannig að það er komið aftur á byrjunarreit og allir vilja fá launahækkun aftur.