Þyrla með hóp bandarískra sérsveitarmanna, íklæddir borgaralegum klæðnaði og vopnaðir M-16-rifflum, lenti á Bagram herstöðinni norður af Kabúl, höfuðborg Afganistans, í morgun, að sögn blaðamanns Reuters-fréttastofunnar. Sex sérsveitarmenn voru í hópnum og var fjórum þeirra fylgt um flugvöllinn af liðsmönnum Norðurbandalagsins, sem tóku höfuðborgina á sitt vald fyrr um morguninn.

Tæki voru flutt úr þyrlunni áður en hún hélt á brott með fjóra sérsveitarmenn en tveir urðu eftir. Talið er að sérsveitarmenn Bandaríkjahers hafi aðstoðað við skipulagningu árása Norðurbandalagsins frá því á föstudagskvöld.

Omar og bin Laden óhultir
Ónefndur talsmaður talibana sagði við írönsku ríkisferéttastofuna í dag að Mohammad Omar, æðsti leiðtogi talibana, og hryðjuverkamaðurinn Osama bin Laden væru báðir óhultir. Þá sagði talsmaðurinn að hersveitir talibana hefðu hörfað frá Kabúl til suðurs í samræmi við fyrirskipan frá Omar.

Fréttastofan hafði eftir talsmanninum að margir hefðu orðið undrandi þegar Omar skipaði þeim að yfirgefa Kabúl en hann hefði jafnframt sagt þeim að búa sig undir langvinnan skæruhernað.

Ungir talibanar drepnir
Sameinuðu þjóðirnar sögðu í morgun, að á annað hundrað ungra talibana hefðu verið drepnir um helgina þar sem þeir földu sig í skóla í borginni Mazir-e-Sharif. Norðurbandalagið náði borginni á sitt vald á föstudag.

Stephanie Bunker talsmaður SÞ sagði að svo virtist sem liðsmenn Norðurbandalagsins bæru ábyrgð á mannfallinu. Talið er að um 200 vopnaðir talibanar hafi búið um sig í skólanum eftir fall borgarinna