Hann á auðvitað ekkert að sleppa með skrekkinn, en það er hreinn barnaskapur og eitthvað meira bælt í gangi hjá þeim sem halda að þeir fái einhverju réttlæti framgengt með því að labba inní garð hjá honum og rífa upp steina. Sumir þroskast misvel og enn aðrir þroskast ekkert. Hvað gerir lítið barn þegar einhver gerir eitthvað á hlut þess og barnið þorir ekki að svara? Brýtur næsta hlut sem hinn á. Sumir þroskast ekkert eins og ég sagði. Ég tek það fram að ég er fokvondur út í Árna Johnsen og hef aldrei þolað þennan mann undarfarin ár. En skemmdarvargar ættu að hefna sín á einhverju öðru en garði næsta manns.

Ég held það sé engin ein grein þar sem þú getur lesið það þannig að þú verður annað hvort að lesa allar greinarnar eða trúa mér.

Það byrjaði þannig að starfsmaður BYKO kærði Árna fyrir að hafa pantað timbur að virði 1 milljón á nafni Þjóðleikhússins en endurmerkt sjálfum sér þegar hann kom með bíl að ná í það. Þegar farið var að athuga málið sagði Árni að þetta væru mistök hjá starfsmönnum vegna þess að þetta hefði átt að fara á sitt nafn en ekki Þjóðleikhúsið og borgaði reikninginn sjálfur. Hann hafði líka gert aðra timburpöntun að upphæð 400 þús. 2 mánuðum fyrr og var hún líka fyrir misskilning skráð á nafn Þjóðleikhússins. Hann borgaði hana því líka.

Þá kemur að kantsteinamálinu mikla. Árni hafði pantað 170 þús. kr. virði af kantsteinum á nafni Þjóðleikhússins en vitað var að hann hafði sjálfur keypt sér slíka steina til að setja í garðinn hjá sér um sama leyti. Þegar hann var beðinn að segja hvar steinar Þjóðleikhússins væru sagði hann að þeir væru í geymslu útí bæ. Honum var boðið að leggja fram kvittun fyrir eigin steinum til að fyrirbyggja misskiling en neitaði því. Daginn eftir viðurkenndi hann að hann hefði notað steina Þjóðleikhússins í garðinn hjá sér. BM Vallá hefur upplýst að Árni kom sjálfur að skila sekkjum utan af steinunum og fékk 12 þús. kr. skilagjald sem Þjóðleikhúsið hafði borgað endurgreitt inn á eigin reikning. Árni segir hins vegar að hann hafi bara notað steinana vegna þess að framkvæmdir við Þjóðleikhúsið hafi tafist og hann hafi ætlað að panta aðra pöntun fyrir Þjóðleikhúsið í staðinn og borga það sjálfur en ekki verið búinn að því. Hann er hins vegar núna búinn að endurgreiða steinana. Hins vegar virðist Árni vera einn um að álíta að þessir steinar yfirleitt henti til þess að gera við tröppurnar á leikhúsinu en það er það sem hann segir að hann hafi ætlað að nota þá í.

Þetta var náttúrulega bara toppurinn á ísjakanum því síðan eru komin upp ýmis önnur mál, t.d. tjarnardúkur fyrir svipaða upphæð sem var keyptur fyrir Þjóðleikhúsið en finnst nú ekki. Árni vísaði á húsvörðinn sem sagði að dúkurinn væri í geymslu útí bæ en nú er komið í ljós að húsvörðurinn hefur aldrei séð dúkinn heldur hefur það eftir Árna að hann sé í geymslu.

Einnig var reikningur byggingarnefndarinnar fyrir veitingum upp á 170 þúsund á einu ári en hinn maðurinn í nefndinni, sem er Þjóðleikhússtjóri, kannast ekki við að hafa þegið veitingar í boði nefndarinnar.

Ég er viss um að fleira kemur í ljós þegar farið verður að velta við steinum. Auk þess alveg kostulegt að það hefur enginn verið að fara yfir þessa reikninga. Þeir hafa bara verið borgaðir. Þess vegna gæti Árni hafa verið að draga sér fé frá ríkinu í áravís.