Það er náttúrulega deginum ljósara að Umferðarráð er göfug stofnun sem svífst einskis í að tryggja umferðaröryggi, alltaf og að eilífu hvað sem það kostar. Staðreyndirnar tala sínu blóði drifna máli. Ungir galgopar af kyni y-litningsins (17-25ára) eru eins og í laginu hiroshima með bubba & utangarðsmönnum (DAUÐINN SITUR Á ATÓMBOM-BU, HÚN FER EKKI FRAMM-HJÁÁ) þeir sem limlesta og keyra niður annað fólk, drepa og meiða, og gera sjálfa sig og aðra, sem á annað borð deyja ekki hræðilegum og margvíslegum dauðdögum, að lömuðum og slefandi, ósjálfbjarga grænmetishausum í 10gíra spítthjólastólum eins og Stephen Hawking (en án snilligáfunnar) það sem eftir er ólifað.
Þetta er sá napri sannleikur sem stofnunin hugprúða kennd við umferð og að ráða reynir að koma inn um loftgötin á þverhausunum á okkur. Málsvarar hennar, eins og mjúki maðurinn valinkunni Sigurður Ólafsson koma á hverjum degi með friðarboðskap sinn og fagnaðarerindi í útvarpið til að segja oss sannleikann, en hnakkakynslóðin lætur umvandanir sér meiri manna sem vind um eyru þjóta á 177+km/klst í sportbílum á bílalánum, með bráðdrepandi sígarettur(jafnvel fylltar af
kannabiseiturefnum) í munnvikunum, bjór í annarri og sterkt áfengi í hinni, að hætti ógæfumanna á borð við Eið Smára Guðmahjojhnsen.
Þessi þróun er auðvitað stórhættu- og háskaleg að öllu leyti, og fagna ég hjartanlega og af öllum kröftum réttsýni Umferðarráðs, með skörunginn og öndvegisheiðursmanninn úr stáli (en með mjúku yfirborði líkt og dýrasta trefjafrauðplast) Sigurð ‘the slayer’ Ólafsson í broddi bílafylkingar.
Ef ég mætti ráða fengju engir karlmenn(17-25ára) að aka bíl fyrren að undangengnum ýtarlegum rannsóknum á líkamsstyrk og sálarheilsu, því við vitum öll að dæmin sanna að það sýnir sig að það eru ungir karlmenn(17-25ára) sem eru hættulegastir!! Þeir eru kannski myndarlegir, en það er Djöfullinn líka, þegar hann kýs sér að vera það! Ef ég mætti ráða, þá myndi ég helst kjósa að gerðar væru mun ágengari
auglýsingar, helst með skilaboðum til að hafa áhrif á undirmeðvitund áhorfenda (e.subliminal messaging, stakir myndrammar með slagorðum eins og ‘ungir karlmenn (17-25ára) eru hættulegir þér, og fjölskyldu þinni!’).
Auglýsingarnar verða í senn að benda á hætturnar í umferðinni, á sem raunverulegastan og graphíscan hátt, til að sem alflestir láti af mótþróa- og áhættuhegðun sinni, og að
benda á yfirburði Umferðarráðs sem aðila að umferðinni, og lífinu í landinu…

Það þarf þjóðarátak!