Tékkar neituðu forseta Hvíta-Rússlands, Alexander Lúkasjenkó, um vegabréfsáritun. Forseti Úkraínu, Leoníd Kútsjma, var ekki velkominn á fundinum líkt og Tékkar og leiðtogar NATO höfðu gefið í skyn. Það að breyta sætaröðinni í kvöldmatnum var einungis til að undirstrika að enginn kærði sig um að hafa Kútsjma þarna. Ekki sé ég hvernig það fellur inn í lýsinguna á hvernig smástelpur leika sér, fyrst að forseti Úkraínu var ekki velkominn til Prag að leika.

Þess má geta að óvild NATO leiðtoga í garð forseta þessara fyrrum Sovét-lýðvelda er tilkomin vegna staðfests gruns um þáttöku Kútsjma í vopnasölu til Íraks og vegna einræðistilburða Lúkasjenkós og gruns um mannréttindabrot í Hvíta-Rússlandi.

Jafnvel þótt endalaust væri hægt að rökræða um að allir aðiljar málsins stunduðu vopnasölu bakvið tjöldin, finnst mér það samt ekki vera dæmi um óþroskaða ákvarðanatöku að bjóða Kútsjma óvelkominn, heldur er verið að gefa þau skilaboð að ólögleg vopnasala til Írak, sem er undir viðskiptabanni SÞ, verði ekki liðin. Enn síður finnst mér að Lúkasjenkó eigi að fá að ganga á rauða dreglinum, á meðan að mannréttindabrot eru framin undir stjórn hans. NATO hlýtur að ráða eftir allt saman við hverja það kýs að eiga viðræður við?

Ég var ekki að gagnrýna allt umstangið kringum sætaskipunina og reglurnar sem verður að fara eftir svo að enginn móðgist.
Ég er að gagnrýna barnaskap þeirra sem lýsir sér í því að breyta þessum reglum til þess að einhver fái ekki að sitja á sínum stað.