Ég held að þetta sé í mörgum tilfellum rétt með þolendurna. Þeir hafa einhver viðbrögð sem gerendunum finnast skemmtileg og veldur því að í staðinn fyrir að vera strítt af og til eins og öllum þá lenda þeir í einelti. Svo getur það náttúrulega orsakast af öðru, t.d. að leiðtogi í hópnum ákveður það að honum finnist einhver leiðinlegur og sigar öllum á hann.

Lausnin er ekki sú að þolendurnir hegði sér öðruvísi heldur þarf að taka gerendurna fyrir og kenna þeim að það sé ekki rétt að leggja í einelti sem ég held að sé best gert með því að spyrja krakkana sem eru að þessu vegna þeim liði ef einhver kæmi svona fram við þau. Ég held að gerendunum þyki þetta yfirleitt bara gaman en eru lítið að spá í því hvort þolendunum líður illa.

Þetta var nú bara ein setning hjá mér sem ég held að þú hafir gjörsamlega oftúlkað. Ég var eingöngu að koma með ákveðna staðreynd þarna og ekki að reyna að kryfja niður einelti í þessari einu setningu. Auðvitað eru miklu flóknari hlutir sem liggja að baki einelti heldur en bara persónugerð þolendanna. Og ég held að ég hafi tekið það skýrt fram hér að ofan að ég er ekki þeirrar skoðunar að einelti sé þolendunum að kenna heldur þveröfugt. Ég veit samt alveg hað þú ert að meina, það fer jafnmikið í taugarnar á mér þegar fólk er að segja að konur geti bara kennt sér sjálfum um að þeim sé nauðgað vegna þess að blablabla svo telja þeir upp miljón ástæður eins og að hún hafi verið of drukkin, verið að daðra of mikið, farið heim með ókunnugum gæja og allt þetta sem við höfum örgglega heyrt miljón sinnum. Þessi setning mín um að einelti tengist frekar persónuleika en útliti átti ekkert að gefa neitt annað í skyn en nákvæmlega það sem hún segir.

Það er margar ástæður sem liggja að baki einelti og þessi einkenni sem þolendur virðast hafa sameiginleg gerir þá engan vegin ábyrga fyrir einelti, rétt eins og það gerir manneskju ekki ábyrga fyrir að vera með t.d. geðsjúkdóm þó að hún hafi ákveðna áhættuþætti fyrir honum, t.d. ef geðsjúkdóur er í ættinni. Þú hefur líklega ekki lesið svarið mitt hérna að ofan nógu vel því þú spyrð áfram hvort það gefi eitthvað gott af sér að koma með einkenni þolenda. Auðvitað getur það haft eitthvað gott í för með sér. Til að vinna bug á einhverju vandamáli er nauðsynlegt að þekkja orsakir og áhættuþætti eins vel og maður getur til að hægt sé að finna út hvað getur dregið úr vandamálinu eða komið í veg fyrir það. Við vitum t.d. að konur sem eru eldri en 35 eru í meiri áhættu á að fá brjóstakrabba, þessvegna eru þær kallaðar oftar í brjóstaskoðun en yngri konur… til að hægt sé að grípa í taumana ef þær greinast og koma í veg fyrir að sjúkdómurinn verður banvænn. Við vitum að börn með ofvirkni eiga í meiri erfiðleikum með að læra en önnur börn, þessvegna fá þau meiri stuðning í skólunum eins og stuðningskennslu (allavegana ef því er við komið)… til að draga úr þessum neikvæðu áhrifum og reyna að koma í veg fyrir að þau dragist aftur úr í skóla. Á sama hátt er gott að þekkja áhættuþætti þolenda eineltis; ef við vitum að börn sem hafa þessi persónuleikaeinkenni eru í áhættu fyrir einelti er hægt að fylgjast betur með þeim í skólanum og hvernig þeim lyndir við skólafélagana… til að hægt sé að kæfa einelti í fæðingunni áður en það nær að brjóta niður einstaklinginn (stundum fyrir lífstíð).

Ég er hér einungis að tala um einn þátt eineltis, með því er ég á engan hátt að draga úr öðrum þáttum þess. Gerendur eineltis hafa einnig ákveðin persónueinkenni:

“Það sem gjarnan einkennir gerendur í einelti, umfram önnur börn, er árásarhneigð og jákvætt viðhorf til ofbeldis og ofbeldisverka. Oftar en ekki eru þessi börn skapbráð og vilja ráða yfir öðrum og njóta oft töluverðra vinsælda meðal félaganna. Þau hafa litla tilfinningu fyrir líðan annarra og eiga erfitt með að setja sig í spor annarra. Öfugt við það sem áður var haldið fram, af sálfræðingum og barnageðlæknum, að þessir nemendur séu í raun hræddir og óöruggir undir yfirborðinu, kemur í ljós við athuganir að þeir eru yfirleitt öruggari með sig en jafnaldrar þeirra.
Oft er hópur meðhjálpara til aðstoðar við að kvelja aðra. Þeir eru stundum með og stundum ekki. Þeir bera ekki sömu einkenni og forystusauðurinn en dragast með sumpart til að koma sér í mjúkinn hjá forsprökkunum eða af hreinni forvitni og múgæsingu”

Ég gæti alveg trúað að þeir sem leggja aðra í einelti eru með þessu móti að sýna fram á vald sitt og halda þessu forystuhlutverki í hópnum. Svo fylgir múgurinn á eftir því börn eru yfirleytt mjög áhrifagjörn og vilja falla inn í hópinn. Auðvitað er þetta algjört hugsunarleysi og að mínu mati er það ábyrgðarhlutverk foreldra og kennara að reyna að ala börnin okkar rétt upp og kenna þeim að bera virðingu fyrir öðrum. Það er örugglega engin töfralausn að einelti, en með því að reyna að skilja ástæðurnar og orsakirnar þarna að baki eigum við auðveldara með að finna leiðir sem geta komið í veg fyrir einelti eða dregið úr því… mikið betra heldur en að vera að giska eitthvað út í loftið og vera svo kannski að beita kolröngum aðferðum.