Ég verð nú að segja það að það er með ólíkindum að menn skuli bera saman verð í USA beint við verð á Íslandi. Eins og JHG bendir réttilega á þá eru vörugjöld hér af bílum með vélar yfir 2,0 45%. Ofan á það leggst 24,5% vaskur og þetta fer ofan á CIF verðið eins og JHG bendir á sem er innkaupsverð, flutningur og trygging. Í USA eru engin vörugjöld og vaskur aldrei meiri en 7,5%. Þar fyrir utan eru flestir þeirra bíla sem þar eru seldir framleiddir í landinu og markaðurinn auðvitað margfalt stærri. Samanburður af þessu tagi er því algerlega út í hött.

Vörugjöldsflokkunum sem voru að mig minnir 7 og sá hæsti þegar mest var um 85% var fækkað árið 1998 í 2, þ.e. 30% undir 2.0 lítra vélum og 45% í stærri en 2,0 lítra vélum.

Þær fullyrðingar að þegar gengi veikist þá hækki bílar en þegar það styrkist þá lækki bílar ekki vísa ég algerlega á bug, a.m.k. hvað Brimborg varðar. Menn eru fljótir að gleyma finnst mér. Árið 2001 hrundi bílamarkaðurinn á Íslandi vegna ytri aðstæðna, krónan féll, verðbólga jókst og atvinnuleysi. Vegna falls krónunnar hefðu bílar átt að hækka verulega í verði. Í ljós kom að bílaumboðin á Íslandi hækkuðu verð aðeins um helming af því sem hefði þurft að vera og reyndu frekar að bíða af sér storminn þangað til krónan næði jafnvægi að nýju.

Nú hefur dollar lækkað verulega og hefur Brimborg sýnt það í verki að lækka verð í samræmi við lækkun dollars enda sést þá á hagstæðu verði og gífurlegri aukningu í sölu. Árið 2002 þegar dollar fór í 110 krónur þegar verst let seldi Brimborg 9 Ford bíla frá USA, árið 2003 fóru þeir í 54 og þegar árið 2004 hefur Brimborg afhent um 250 Ford bíla frá USA og líklegt að þeir fari í 400 áður en árið er úti.

Menn virðast mjög oft hrapa að ályktunum. Maður heyrir t.d. allt of mikið um það að menn séu að flytja inn bíla og telja sig vera að gera góð kaup. En þegar nánar er að gáð hafa viðkomandi aðilar ekki einu sinni gert lágmarksrannsóknir á því hvað sambærlegur bíll kostar út úr búð hér á landi. Eða hvað svona bíll kostar notaður á markaði hér. Þetta er enn skrítnara t.d. hvað varðar Ford þar sem allir verðlistar og staðalbúnaður er mjög aðgengilegur í sýningarsal Brimborgar og því auðvelt að gera samanburð. Stundum heldur maður að menn vilji ekki gera samanburðinn af hræðslu við að sjá hversu óhagstæð kaup margir eru að gera.

Hriklegast er að horfa upp á fólk kaupa notaða bíla óséða í gegnum netið. Þegar bílarnir koma er ástandið í engu samræmi við það sem lofað var og viðgerðar reikningar setja allt dæmið á hvolf.

Ég hef t.d. séð nokkra Ford Explorer Sportrac bíla á bílasölum hérlendis t.d. tveggja ára gamla. Það er kannski verið að setja á þessa bíla 3,5 milljónir meðan hægt er að fá nýjan sambærilegan bíl hjá Brimborg fyrir rétt rúmlega þrjár. Skrítið.

Niðurstaðan. Kapp er best með forsjá og mikilvægt að vinna ákveðna heimavinnu áður en lagt er af stað. Og það er auðvelt. Bara ef menn nenna því. Og auðvitað aldrei að kaupa neitt óséð. Ekki myndi maður gera það hér heima. Hvað þá í útlöndum þar sem mun erfiðara er að sækja rétt sinn ef eitthvað kemur upp á.

Virðingarfyllst.
Brimborg ehf.
Egill Jóhannsson