Nú þekki ég ekki forsögu þessa máls sem þráðurinn byrjar á þ.e. hvort hann tengist dekkjamálinu eða ekki. En það er rétt hjá JHG að undir ákveðnum kringumstæðum á eldri gerðum Explorer vildu Firestone dekkin gefa sig. Rannsóknir Ford sýndu að það gerðist ef EKKI var farið eftir leiðbeiningum um réttan loftþrýsting og hleðslu bílanna. Þ.e.a.s. ef of lítið loft var í dekkjunum og bílarnir yfirhlaðnir og þá sérstaklega ef lofthiti var mikill þá gátu dekkin átt það til að springa á ferð.

Skv. óháðri rannsókn átti þetta eingöngu við ákveðnar gerðir Firestone dekkja. Ford innkallaði umsvifalaust alla bíla á þessum dekkjum og allir fengu ný dekk. Ford innkallaði síðan milljónir dekkja til viðbótar af Firestone gerð án þess að gerð væri krafa um það en fyrirtækið vildi vera 100% öruggt um að allt yrði í lagi.

Brimborg innkallaði nokkra tugi bíla hér á landi og lét ný dekk í staðinn þó enginn óhöpp hefðu komið upp enda loftslag hér með þannig hætti að ólíklegt var að þetta myndi gerast.

Þrátt fyrir allar þessar innkallanir vildi Ford Motor Company meina að ekki væri hægt að sýna fram á að um hlutfallslega fleiri veltur væri að ræða á Ford en öðrum jeppum. Explorer er aftur á móti mest seldi jeppi í USA og því fleiri Explorer jeppar á götunum og því líklegra ef óhapp verður að það sé Explorer.

Þetta mál sýndi líka hversu algengt það er að rangur loftþrýstingur er í dekkjum og virðist almennt lítill skilningur vera á því hjá ökumönnum þó allir geti verið sammála um mikilvægi þess atriðis. Bæði hvað varðar öryggi og endingu dekkjanna.

Virðingarfyllst.
Brimborg ehf.
Egill Jóhannsson