Á Alþjóðabílasýningunni í Frankfurt (IAA), sem haldin verður í september næstkomandi, verða ýmsir nýji og athyglisverðir bílar frumsýndir.

Sem dæmi mun 4. kynslóð VW Polo verða kynnt til sögunnar en bíllinn hefur verið endurhannaður frá toppi til táar. Þar vekja ný framljós sérstaka athygli en þau eru 4 talsins og öll kringlótt. Núverandi útgáfa af Polo er einungis búin að vera á markaðnum í rúm 2 ár og vekur það því talsverða furðu að strax skuli vera komin ný útgáfa. Nýr VW Polo kemur til sölu í Evrópu næsta haust.

Fjarskyldur ættingi VW verður einnig frumsýndur í Frankfurt en það er bíll sem ber nafnið Skoda Superb og er byggður á breyttum undirvagni VW Passat. Superb nafnið er ekki ókunnugt í Skodaverksmiðjunum en fyrsti Superb bíllinn var framleiddur á árunum 1934 - 1947 með ýmsum vélarstærðum og vekur þar helst athygli 8 strokka 4000 cm3 vél sem á að hafa skilað heilum 95 hestöflum.

Bíllinn mun verða flokkaður í D Class og eru utanmálin á honum 4800 X 1700 X 1400 mm (lengd, breidd, hæð). Hjólhaf bílsins er 2800 mm sem mun vera það mesta í bílum í D Class og tryggir það að bíllinn er mjög rúmgóður innandyra.

3 bensínvélar verða í boði í bílnum og eru tölulegar staðreyndir um þær eftirfarandi:

2000 cm3 sem skilar 115 hö
1800 cm3, 20V túrbóvél sem skilar 150 hö
2800 cm3, V-6 sem skilar 193 hö

Díselaðdáendur verða ekki fyrir vonbrigðum en þeir geta valið á milli 2 umhverfisvænna og eyðslugrannra díselvéla.

Sagan segir að Skoda hafi áhuga á að setja 8 strokka vél í bílinn eins og gert var með gamla Superb bílinn. Skoda með 8 strokka vél hefði þótt góður brandari fyrir nokkrum árum en í dag þykir þetta ekki vera svo fjarlægur draumur.

Ekki hefur enn komið fram hvenær bíllinn verður settur í framleiðslu en Skoda stefnir að að hann verði verðlagður svipað og Ford Mondeo.