Hefurðu lesið Yosoy eftir Guðrúnu Evu Mínervudóttur?

Líkamslistahryllingsleikhús í Mosfellssveit hljómar kannski furðulega en í heiminum í dag er margt furðulegt.

Læknirinn Ólafur Benediktsson er í miðri tilvistarkreppu og fær óvænt það hlutverk að njósna um starfsemi líkamslistahryllingsleikhúss sem starfrækt er í Álafosskvosinni í Mosfellsbæ. Þegar hann kynnist listamönnum leikhússins og nágrönnum sínum neyðist hann til að horfast illilega í augu við sjálfan meðan hann reynir að fá botn í allt sem er að gerast í kringum hann.

Óvenjuleg saga um óvenjulegt fólk. Í textanum felast spurningar um hvað mannfólkið er að verða eða jafnvel orðið. Ef sífellt þarf að ganga lengra, hvenær verður mörkunum náð? Er sársauki vondur? Á að útrýma honum? Hvað er eftirsóknarvert fyrir þá sem eiga nóga peninga til að kaupa allt það sem hugurinn girnist?

Þetta er bók sem hristir upp í manni en er ekki fyrir mjög viðkvæma. Textinn er lipur, söguþráðurinn ekki beinlínis raunsær en Gúðrúnu Evu tekst að gera hann trúanlegan og hún veltir upp athyglisverðum pælingum.