Datt í hug að senda inn grein um þessa bók - ég fékk hana lánaða um daginn, án þess að hafa heyrt mikið um hana, og gat ekki hætt að lesa hana!

Bókin fjallar um Leilu, eins og titillinn gefur til kynna, sem að er 15 ára þegar að borgarastyrjöldin braust út í Bosníu.
___________________
Tekið aftan af bók:
Þetta er sönn frásögn af örlögum bosnískrar stúlku sem lenti í nauðgunarbúðum Serba á meðan borgarastíðið á Balkanskaga stóð yfir. Leila var ósköp venjulegur unglingur sem hlustaði á sömu poppmúsíkina og hafði sömu plakötin uppi á herbergisveggnum sínum og jafnaldrar hennar um alla Evrópu. En þegar hún var fimmtán ára braust stríðið út. Fáeinum mánuðum síðar var henni varpað í fangabúðir þar sem hún þurfti að líða bæði kulda og hungur. Samt var þetta aðeins forleikurinn að öðru verra – nauðgunarbúðunum þar sem æska hennar var lögð í rúst.

Frásögn Leilu lýsir atburðum sem erfitt er að gera sér í hugarlund hvernig gátu átt sér stað. En frásögn hennar er enginn uppspuni, heldur heiðarleg lýsing á hryllingi borgarastríðsins, óreiðu lögleysunnar og kerfisbundinni niðurlægingu kvenna í stríði þar sem nágrannar og vinir börðust. Hún er í senn viðvörun og áminning um að atburðir sem þessir geta gerst hvar sem er á hnettinum. Þetta er saga fórnarlambs grimmúðlegs borgarastríðs sögð af styrk þess sem ætlaði sér þrátt fyrir allt að halda lífi og reisn.
____________

Mér fannst þetta vera alveg rosalega átakanleg saga, en ég er fædd sama ár og þessi stelpa og gat því rifjað upp hvað ég var að gera á þessum sama tíma og hún lenti í þessu öllu. Ég get varla sagt ykkur hvað ég skammast mín fyrir mín “vandamál” á þessum tíma miðað við það helvíti sem að hún og þessar konur eru látnar ganga í gegn um!

Ég hvet alla vega þá sem að ekki hafa lesið bókina að drífa í því!

kv. Spikesgirl