Ég skrifa þessa grein til að færa ykkur fréttir af nýju stjórnmálaafli sem mun gerbreyta íslenskum stjórnmálum eins og við þekkjum þau í dag. Það er deginum ljósara að núverandi stjórnvöld eru blinduð af kapítalískri græðgishyggju og munu áður en langt um líður einkavæða heilbrigðiskerfið, skólakerfið og lögregluna. Einnig munu þau afnema allar bætur, svo að fólk sem minna má sín mun deyja á götum úti. Hins vegar er hinn valmöguleikinn, stjórnarandstaðan, síður betri kostur. Hún samanstendur af kommúnistum í lopapeysum sem munu ríkisvæða matvöruverslun og skíðaframleiðslu ef þeir fá tækifæri á því, en við þurfum lítið annað að gera en líta til Sovétríkjanna til að sjá hvernig slíkt myndi fara.

Aðstæður sem þessar kalla á þriðja möguleikann. Og sá möguleiki er Lausnaflokkurinn. Flokkur sem mun leysa vandamál í stað þess að skapa þau. Flokkurinn byggir á hugmyndafræði sem nefnist lausnahyggja eða lausnismi eftir því hvernig fólk vill þýða enska heitið solutionism. Stefnan er að mestu upprunin upp úr skrifum hins merka stjórnmálafræðings Max Knudsens, en hann hefur skrifað margar bækur um þessa merku hugsjón. Má þar nefna: Life, politics and the solution to both; Why solutionism? And why not? og People’s right to solutions. Ég hvet alla til þess að kynna sér þessar bækur og ég ábyrgist að þær munu breyta lífi ykkar.

En fyrir þá sem eru latir og nenna ekki að kynna sér málið ítarlega hef ég tekið saman helstu stefnumál Lausnaflokksins:

Allir skattar verða lækkaðir niður í mínus 60 prósent. Mun þetta verða svo vinnuhvetjandi og auka hagvöxt svo mikið að ríkissjóður mun standa uppi með meira en hann hafði áður.

Aukið fjármagn verður sett í heilbrigiðskerfið og mun það verða besta heilbrigðiskerfi í heimi.

Tekið verður hart á fíkniefnavandanum og eftirlit með ólöglegum fíkniefnum aukið til muna og refsingar hertar sömuleiðis, til að vernda fólk gegn því helvíti sem það er að falla í myrkraheim fíkninnar eða að horfa upp á einhvern nákominn gera það.

Háskólar og framhaldskólar verða einkavæddir, enda ólíðanlegt að fólk sé að borga undir menntun annars fólks.

Lágmarkslaun verða hækkuð í 660.000 krónur á mánuði.

Persónuaflsáttur verður hækkaður í 45.000.000 krónur á ári.

Öll dýrin í skóginum eiga að vera vinir.

Fíkniefni verða lögleidd, enda sjálfsagður réttur fólks að ákveða sjálft hvað það gerir við eigin líkama.

Aukið fjármagn verður sett í háskóla og skólagjöld afnumin til að tryggja jafnrétti til náms, óháð efnahag foreldra.



Þetta er aðeins það helsta. En ég fullvissa ykkur að ef þið vitið um vandamál í samfélginu þá hefur Lausnaflokkurinn lausnina. Annars héti hann varla Lausnaflokkurinn, er það? Þið spyrjið ykkur kannski að því hvernig Lausnaflokkurinn mun gera allt þetta. Leysa öll þessi vandamál. Er það yfirhöfuð hægt, og ef svo er, hvernig? En ég get glatt ykkur með því að þið þurfið ekki að hafa áhyggjur af því. Það eina sem þið þurfið að hafa áhyggjur af er það hvernig þið getið hjálpað Lausnaflokknum að gera það. Og svarið er ofureinfalt. Þið merkið einfaldega við Lausnaflokkinn í næstu alþingiskosningum.

Ég geri mér grein fyrir því að fjórði valmöguleikinn er til staðar, eða hinn svokallaði “Eiginhagsmunaflokkur fabiliusar”. Hins vegar getur hver maður séð að það er ekki heil brú í stefnu þess flokks.

Þannig að niðurstaðan er einföld.

X-Lausnaflokkurinn - Því þú, og börnin þín, eiga það skilið.